TURA: Garo Hills-o COVID-19 sabisi giproroa baksana sianggiparang batrikrikengani gimin authority, sabisiko champengna kam ka·ani namen neng·nikako man·enga. Garo Hills-o mongsongbate chadamberangni covid sae siako nikna man·enga.
Re·anggipa Sukrobar salo South Garo Hills, Baghmara-ni Dabrang-oni bilsi 3 jachetsan ong·kuenggipa me·chik bi·sa, covid sabisi man·e siaha. Sabisi man·ani salgipinon ua bi·sa siaha.
Indake Bristibar salo, bilsi 23-oni 35-ona ong·gipa sakgittam sianggipao sakgni chadamberang covid sae siaha. Saksa Tura songjinmaoni chel·ao donggipa songadamoni ong·a aro sakgipin South West Garo Hills-oni ong·skaa.
Una skang bilsi 23 ong·gipa me·chik, jean Tura Dobasipara-oni ong·achim, ua covid saa man·e siangaha.
Garo Hills-o bilsi chadamberangni covid sabisi man·e siangako nikna man·engani gimin authority-na namen jajrengani ong·enga.
“Minggipin bilsi 23 aro 35-oni gisepo ong·gipa sianggipa sakgnian covid tikako su·a dongja ine West Garo Hills -ni Deputy Commissioner Ram Singh aganaha.
“Uni gimin chinga manderangko changni chang sabisioni naljokna covid tikako su·china agantaitaienga, ineba Singh aganataha.
