SHILLONG: Gitcham Cabinet Minister AL Hek aro rimnapgital cabinet Minister, Sanbor Shullai mang sakgnian, A·doko uamangni dol BJP-ko bilakbatatna gita aro re·baenggipa 2023 bilsio Meghalayao BJP-ko sorkarini bilona sokbaatna gita melie kam ka·rimna kang·kare kaaha.
Hek, uko cabinet-oniko ra·galenba uni biapo Shullai-ko rimnapani ru·utgijan, Shullai-ni nokona re·angenba uko mandera·aniko dakeaha aro manderangna dangdike on·angkuchina gita didianiko on·aha.
Ua, bilsi gittamna batpile MDA-na dangdike on·aha aro da·ode Sanbor Shullai-na chol on·skana nanga, aro gitalgipa gadango manderangna dangdike on·skana cholko on·na nanga ineba Hek aganaha.
Re·baenggipa 2023 bilsio Meghalayao BJP-chi re·dilgipa sorkariko rikna gita sakgnian melie kam ka·gen, uamangko jujagrikatani bidingo party-on chanchigrikaha aro bamgipa sipairang ong·e chanchigiminko ra·chakna nanga ineba Hek aganaha.
Unomitingo, Meghalaya party president-ni kamko jako ra·na tariengama ine sing·anina aganchakengon, party una daitoko on·ode ra·aigen ineba Pa Hek aganaha.
Uamang sakgnini gisepo maming ma·sisretgrikani dongja, uamang sakgnian melienba a·dok aro uni manderangna kamrangko ka·anggen ine gitcham minister aganaha.
Minggipin, Minister-ona gital rimnapako man·gipa Sanbor Shullai indake aganaha je A·dokni manderang BJP-ko namnikangtokengjok, re·baenggipa 2023 Assembly poll-o komibeoba ge 13-14 seat-rangko chena gita uamang mikpakma nienga.
