TURA: Selsella-o automated teller machine (ATM) dongkujae manderang an·tangtangni tangka paisarangko okanio neng·nikanirangko chagrongna nangtokenga ine A·chik Students Welfare Association (ASWA) parakatenba, Selsella-o ATM damsako kulie on·china gita Tura Chandmary-o donggipa SBI regional branch-ni manager-na sedoataha.
ASWA-ni president HD N Sangma-ni kobor setimgiparangna parakatani gitade, SBI Selsella branch-o ATM dongkujaengani gimin manderang bank-onasa re·ange an·tangtangni tangka paisarango okna nangenga aro uandaken manderang ru·ute riting dakesa tangka paisarangko okna nangengani a·sel neng·nikanirangko chagrongna nangtokengachim.
“Ia sal somoirango COVID-19 giproroaniko champengna jinma tom·dakanirangko champengengoba, manderang tangka paisarangko okna nangskaengani gimin pangnan bank-on mande bang·e tom·dakanirangko nikna nangenga. Basakobade mande bang·tingani a·selan ru·ute sengani ja·manoba tangka paisarangko okna man·ja aro uandaken salgipinrangosa bank-ona re·bapile tangka paisarangko okna nangtokenga,” ine ASWA-ni president parakatenba, ia jolrango manderangni neng·nikanirangko komiatna gita ATM damsako kulie on·china gita SBI-ni official-ko didiataha.