TURA: Mijal Bristibar salo, Dalu constituency-ni MLA Brening A Sangma, NPP Dalu Block-ni president Kapil A Sangma, Dalu civil sub-division joint movement committee-ni chairman Junstemey R Marak aro Phukan Memorial College Students Union-ni general secretary Pantora R Marak-ni dilanichi, Dalu civil sub-division joint movement committee-ni membor-rang, Meghalaya a·dokni Chief Minister Conrad K Sangma-ko grongenba, Dalu-ko civil sub-division songchina dabie memorandum-ko on·angtaiaha.
Dalu civil sub-division joint movement committee-ni chairman Junstemey Marak-ni u·iatani gitade, batanggimin changrangoba uamang Dalu-ko civil sub-division songchina dabie a·dok sorkarina memorandum-rangko on·angahachim aro uandaken ia changoba uamang, sorkariko gisik ra·attaina gita memorandum-ko chief minister-ni jako on·angaha.
Ia Dalu sub-division-ni ning·o Dalu C&RD Block, Gambegre C&RD Block aro Chokpot C&RD Block-rangni ning·o ga·akgipa biaprangko man·chape songchina gita committee dabienga ineba Marak u·iataha.
“Durabanda jolni manderang, Tura bazar-ko anti cha·eba office-ni kamrangnade Baghmara-ona re·skana nangengani a·sel bang·a neng·nikanirangko chagrongna nangtokenga. Uni gimin Dalu sub-division-o Chokpot Block-ni ning·o donggipa Durabanda GS circle aro Sangkini GS circle-ko man·chape songchina chinga dabienga,” ine Dalu civil sub-division joint movement committee-ni chairman parakataha.
Marak-ni u·iatani gitade, ru·uta bilsirangna skangonin Dalu-ko civil sub-division songchina dabiani gnangchim indiba sub-division-ko dabidilgiparang dingtang dingtang obostarangni a·sel dabianiko donchipna nangahani gimin 2017 bilsini October 21 tariko gital committee-ko songtaie Dalu sub-division-ko dabina a·bachengpiltaiaha.
“Meghalaya a·dokara mongsonggipa Tribal jatgittamni a·dok ong·a. Khasi Hills-o Ranikor sub-division-ko songaha, da·o Garo Hills-oba Dalu-ko sub-division songskana nangani ong·engaha maina pilakni gita nigopate nion Dalu civil sub-division-ko man·na krachongmota,” ine Marak parakataha.
Joint movement committee-ni parakatani gitade, Dalu block-ni ning·o chu·onga gitan LP skulrang, UP skulrang, higher secondary skul aro college baksana dingtang dingtang department-ni office-rang jekai, PWD, MePDCL, PHE, Irrigation, CHC, Veterinary, Bank, Police Station aro uandake dingtang dingtang office-rangba donga aro ia Dalu block-ba Garo Hills-o gitchambatsranggipa block-rangoni damsa ong·engani gimin ia block-ko civil sub division songna nangengahachim.
Indake ong·engon, Dalu-ko sub-division songani bidingo sorkari name nichenggen aro ja·manosa sub-division songani giminde ma·sigen ine a·dokni Chief Minister, committee-ni dilgiparangna aganchakataha.
