SHILLONG: Adita salrangna skang Union Home Minister Amit Shah-ni Shillong-ona re·baani somoio, Inner Line Permit (ILP)-ko dabidilenggipa dingtang dingtang dolrang, unbaksa name golporikna man·jahani gimin ia dolrang, an·tangtangni suk ong·gijaniko mesokna gita gital dake jingjengattainaba gnang.
Koborko on·ani gitade, re·anggipa July-ni 24 tariko uni Shillong-ona re·baani somoio Amit Shah, ILP-na dabienggipa dolrangni agananirangkode knatime ra·angahachim indiba ILP-ko on·ani giminde mamingkoba aganangskajahani gimin ia dolrang suk ong·tokjahachim.
Re·anggipa Budbar salo Khasi Students Union (KSU)-ni president Lambokstar Marngar-ni parakatani gitade, uamang mikkangchi dakna nanggnirangko da·o chanchiengkua.
“Chinga jinma asongenba, ja·ku de·na nanganirangko tik ka·anggen,” ine KSU-ni president parakataha.
A·doko jatko dilenggiparang, dingtang dingtang NGO-rang aro a·doko songdongenggipa manderang baksa bakrime uamang a·dok gimikon jingjengatanirangko dakanggen ine Confederation of Meghalaya Social Organisations (CoMSO)-ni chairman Robertjune Kharjahrin-ba parakataha.
ILP-ko on·ani bidingo Union Home Minister maming ku·rachakaniko on·jahaoba, Meghalaya a·dokna ILP-ko dabiani bidingo ma·mong sorkari nipiltaienga ine a·dokni Chief Minister Conrad K Sangma-de aganskaahachim.