AMPATI: Songni nokni manderangna COVID-19-ni tikarangko su·ani bidingo agan-talate on·na aro tikarangko su·na kam ka·ani bak gita re·anggipa Bristibar salo, self help group (SHG)-rangni tom·aniko aro COVID vaccination program-ko Betasing C&RD Block office baksana District Health department aro Meghalaya State Rural Livelihood Society, Betasing unit nangrime, South West Garo Hills a·jani Monabari songo ong·atangaha.
Ia tom·aniko ong·atanio South West Garo Hills a·jani Additional Deputy Commissioner AVD Shira, jinmana aganprakangengon, tikarangko su·e ra·anichisan aro COVID-ko warachakna dongimin niamrang, jekai mask-ko kinggni ganani, saksa sakgipinoni chel·tanggrike dongani aro jakrangko rongtalatjringanichisan corona virus-oniko naljoke rakkina man·gen ine parakangenba, an·tangtangko aro an·tangtangni nokdangko ia kenbegnigipa sabisioniko naljoke rakkina gita tikarangko su·e ra·china songni nokni manderangko didiangaha.
Ia program-ko ong·atanio Betasing block-ni BDO WRG Momin, AH & Vety Officer Dr Nokman A Sangma aro MSRLS-ni DPM, a·jao donggipa SHG-rangna on·enggipa dingtang dingtang janggi tangani cholrangni gimin talate on·angaha aro COVID-ni tikarangko su·ani bidingo M&HO Dr Chiringchi Momin, songni nokni manderangna agan-talate on·angskaaha.
Tom·a matchotani ja·mano Monabari aro samba jolo donggipa dingtang dingtang songrangoni sak 32 manderang, COVID-ni tikarangko su·e ra·angaha.
Ia program-ko ong·atanio Monabari cluster-oni SHG-rang, an·tangtangni tarigimin bosturangko ra·bae manderangna pale sim·e on·angaha.
SWGH-o SHG-rangni tom·ani aro COVID tika su·ani program-ko ong·atanga
Date:
Share post:
