TURA: Adita salrangna skang, Ri Bhoi a·jao gopretna jakkalgipa bosturangko man·ani ja·man police-rang, ning·tue sandianirangko dakangkuenba, mande sakgniko West Garo Hills a·jani police-rang Bristibar salo rim·dapna man·aha.
Ia mande sakgniko rim·ani ja·mano police-rang, sing·sandianirangko dakenba, a·songo tarigipa SBML silchidare ponggnikoba man·aha.
Ia silchidarerangko police-rang, South West Garo Hills a·jani Damalgre police station-ni ning·o ga·akgipa biaponiko man·aha ine kobor on·aha.
Adita salrangna skangsan, West Garo Hills a·jani police-rang, Ri Bhoi a·jani police-rang baksa nangrime sandienba, gopretna jakkalgipa bosturangko Ri Bhoi a·jani song damsaoniko man·ahachim aro ia bosturangko man·ani ja·mano mande saksakoba police-rang rim·ahachim.
Bristibar salo sakgni manderangko rim·taina man·ahani gimin da·o ia case-o pangchake rim·ako man·gipa manderang gimik sakdok gapengaha.
