SHILLONG: Adita salrangna skang North Garo Hills-o mande saksako blackman (mande gisim) ine potenba songni manderang dokgrimaha.
Mande saksako songni manderangni go·olrangchi dokgrimani videoba social mediao jangahachim ine nikna man·a.
Ia a·sel re·anggipa Butbaro ong·aha aro ia a·sel ong·ako knaani joljolan police, a·sel ong·gipa biapona daariangaha aro doka man·gipa mandeko naljokateaha ine North Garo Hills SP, Abraham T Sangma u·iataha.
Sangmani aganani gitade, ia mandeko songo rim·soenba blackman ine potenba songni manderang dokgrimaha.
Doka man·gipa mande FIR ka·a dongkuja indiba a·selrangko nike police, mamlako jako ra·aha.
Da·o dipet darangkoba rim·a dongkuja indiba mande dokanio jak donggiparangko police okamenga.
Doka man·gipa mande da·o name dongenga.
Mendipathar jolo blackman ingipani bidingo social mediarango jangatenba jajrenganiko ong·atengani gimin, CI Mendipathar Circle aro IC, Dainadubi Outpost, Bristibaro Dainadubi OP-o tom·aniko ong·ataha, jeon dam 27 songni headman-rang bakko ra·aha.
Indake walni somoirango gittimrango nitim nirokanirangko dakengon simsakchina aro ong·gija jangatanirangko bebera·jachina aroba nangai nangjaide walo nitimatanirangko dakatjachina gita songdni dilgiparangna ku·pattiataha.
