SHILLONG: National People’s Party (NPP)-ni office-ko Bristibar salo NPP-ni national president aro Meghalaya a·dokni Chief Minister Conrad K Sangma, Delhi songjinmani 75 North Avenues-o nokdonggae on·angaha.
Delhi-o ia NPP-ni office-ko nokdonggae on·angani somoio Meghalaya a·dokni Deputy Chief Minister Prestone Tynsong, Manipur a·dokni Deputy CM Joykumar Singh, Meghalaya a·dokni Rajya Sabha MP WR Kharlukhi, Tura-ni Lok Sabha MP Agatha K Sangma, Lok Sabha-ni gitcham Speaker PA Sangma sagini jikgipa Soradini K Sangma, NPP-ni national vice president DD Lapang aro gipin dilgiparangba dongpae bak ra·angaha.
NPP-ni office-ko nokdonggae on·anganio NPP-ni national president jinmana aganprakengon, ia gital office-ko an·tangni pagipa sagi aro Lok Sabha-ni gitcham Speaker PA Sangma-na pakwate on·angenba, mikkangchi NPP dolko bilakbatatna gita rakbate kamrangko ka·angkuchina NPP-ni dilgiparangko aro dingtang dingtang membor-rangko didiangaha.
NPP dolara a·songni chetgipa national party ong·a aro salgro salaram a·dokrango NPP dolan skanggipa national party ong·a ine nikna man·a.
Ia office-ko nokdonggae on·angani ja·man NPP-ni dilgiparang, Constitution Club-o tom·e, NPP-ko mikkangchi bilakbate rikangkuna gita ku·mikchettokaha.
