TURA: Garo Hills-oba drugs ba pekatgipa samrangko jakkalanirang batroroengahani gimin skatang sam jakkalaniko aro bading chiwalaniko champengna gita Meghalaya Drug Abuse Prevention Policy 2020-o pangchake Social Welfare Department-ni ge·etaniko man·e West Garo Hills a·jaoba District Level Coordination Committee-ko songaha ine West Garo Hills a·jani Deputy Commissioner Ram Singh u·iataha.
Ia committee-ko Deputy Commissioner an·tangan chairman ong·e dilgen aro membor secretary-ni kamko West Garo Hills a·jani District Social Welfare Officer jako ra·skagen. Una agreba, a·jani Superintendent of Police (SP), District Home Guards-ni Commandant, DCIC-ni General Manager, District School Education Officer, District Medical & Health Officer, Deputy Labour Commissioner, DIPR-ni Assistant Director, Superintendent of Excise, District Sports Officer aro District Legal Service Authority-ni Secretary-koba ia committee-ni membor songskaaha.
Ia committee-ni non-official membor-na Japang NGO, A·chik Welfare Society (AWS), Krima IV, Socio Economic Development Society (SEWS), Women Economic Development Society (WEDS) aro Drug User’s Network-ni official saksakoba songaha.
Ia committee-ni kamrangni gimin talatangengon, ia committee-ni membor-rang jagittamprako changsa tom·enba Meghalaya Drugs Abuse Prevention Policy-o dongimin niamrang gita kamko ka·anggen, Block Level Coordination Comittee-ni kamrangko nianggen aro skulrango, college-rango awareness program-rangko ong·atanggen ine committee-ni chairman parakataha.
West Garo Hills a·jao drugs jakkalgipa manderangko sandie ia committee-an rehabilitation centre aro hospital-rangonaba rimanggen aro nanga gita agan-ku·pattianirangkoba on·gen ineba Singh parakataha.