TURA: Garo Hills Autonomous District Council (GHADC)-ni gitcham chief executive membor (CEM) aro Meghalaya a·dokna krengdilgiparangoni saksa Binsing R Marak, Bristibar walo a·gilsakko watangaha.
Ua da·o bilsi 99 ong·ahachim aro jagnini ja·manon ua bilsi 100 gapgnokchim.
Koborko on·ani gitade, uko COVID-19-na porikka ra·anio positive ong·aha aro ua rasong gribee Bristibar walon a·gilsakko watangaha.
Binsing R Marak, jekon A·chik a·songni manderang ‘Naglangpa’ ine okamachim, bilsi 26-na kingking GHADC-o seokako man·gipa membor ong·angahachim aro ua changgnina chief executive membor-ba ong·angahachim.
Ua 1922 bilsini October 31 tariko Silkigre songo atchiaha aro 1942 bilsioni 1945 bilsiona a·gilsak gimikni gnigipa dakgrikanioba ua Garo Porter Corps-ni sector commander ong·e kamko ka·ahachim.
Tura district jail-oba ua warden-ni kamko ka·aha aro Silkigre (Chokpot) baksana Purakhasia (Babelapara)-ni sorkari skulrangoba ua skigipani kamko ka·ahachim.
1947 bilsio ua Garo National Council (GNC) dolo nape politics-ni kamko ka·na a·bachengskaaha aro ua somoio GNC dolba All Party Hill Leaders Conference (APHLC)-ni ning·o Khasi Hills-oni Hills People Union (HPU) baksa nangrime a·brirango songdongenggipa manderangna Assam-oniko ma·eke dingtang a·dokko on·china dabiengahachim.
Ua bilsi 40 batpile GNC-ni membor ong·e kamko ka·angaha aro 1957 bilsio gnigipa changna council-ni election-ko ong·atanio ua Babelapara MDC constituency-o susachengaha.
1957 bilsioni 1983 bilsiona kingking Binsing Raksam Marak, seokako man·gipa MDC ong·e, GHADC-o executive membor, Deputy CEM aro ja·mano CEM-naba seokako man·aha.
