SHILLONG: Re·anggipa August 13 tariko, police-ni operation ka·miting somoio HNLC bobil dolni gitcham general secretary Cheristerfield Thangkiew-ni so·ota man·ani ja·man Robibaro a·doko kajia golmalrang ong·ani ja·man, Meghalaya Home Minister Lahkmen Rymbui, kamtangko wataha.
Chief Minister, Conrad Sangma da·o dipetode uni kam wataniko ra·chaka dongkujaenga.
HNLC-ni gitcham dilgipani, police-ni jako so·ota man·ani gimin golmal gondokol ong·ani gimin, Rymbui, an·tangko home department-oniko naljokatchina gita Chief Minister-ko aganahachim.
Indake ong·genchimoba, Rymbui-ni kam watani chittiko man·soahaomangba da·o dipetode iani bidingo mamingkoba chanchikuja ine Chief Minister, Conrad Sangma Sombaro aganaha.
“A·sel obostarangko anga nichenggen aro somoiko nigrike iani bidingo chanchigen” ineba Pa Sangma aganaha.
Party-ni manderang baksa chanchirimani ja·mano Home Minister, kam watani chittiko on·aha ine Chief Minister aganaha.
“Saksa Chief Minister ong·e, pilakchikon ba pilak obostarangko nigrikna nanggen, uni ja·mano somoiko nigrike jekoba chinga chanchigen,” Pa Sangma agandapaha.
Rang·gitik re·ange operation ka·aniko dakemiting somoio HNLC bobil dolni gitcham general secretary Chesterfield Thangkhiew-ni police-ni jako so·ota man·ani ja·mano niam aro ainni obostarang so·sojengjeng ong·anio pangchake kamtangko watenga ine Rymbui, uni chittio janapahachim.
Indake Robibaro Shillong songjinmao golmalrang ong·ani gimin attam 6 bajionin joljo curfew-ko konta 48-na ra·gatatahachim, jekon da·o Butbar pring 5 bajiona ra·doattaiaha.
