TURA: A·songni gipin biaprango gitan a·songni chang 75-gipa jakgitelani salko North Eastern Hill University (NEHU) Tura campus-oba maniangaha aro ia salko manianio university-o kam ka·enggiparang aro uamangni nokdangrangba bakko ra·angaha.
Ia manianio NEHU Tura campus-ni Pro Vice Chancellor Prof G Singaiah, a·songni nisanko badale on·angenba, tom·anio bak ra·giparangna aganprakengon, British-rangni sasononiko jakgitel ong·atna gita an·tangtangko on·kange kam ka·ahani gimin a·songni pagitcham ma·gitchamrangko mittelpilangaha.
NEHU Tura campus-ko dal·roro-silroroatna gita ia university-o kam ka·enggiparangsan ong·aigija a·songni dingtang dingtang manderangba kam ka·enga ineba Prof Singaiah aganaha.
Ia salko manianio A·chikku sea jotanichi a·songna dangdike on·enggipa Ma Icylian R Marak aro gama ge·anichi Padma Shri Award-ko man·gipa Gondagre songni Nanandro B Marak-na dingtangmancha NEHU Tura campus-ni gita mande ra·pilskaaniko dakangjolaha.
Ia bilsini March April jarango PVC Cup cricket kal·susaaniko ong·atanio bak ra·gipa dolrangna aro uamangni dilgiparangnaba ia salko manianio mande ra·pilskaaniko dakangaha.
Ia bilsini SSLC aro HSSLC porikkarango teng·sugipa chatro chatrirangna aro uamangni skigiparangnaba ia salko manianio NEHU Tura campus-ni gita mande ra·pilskaaniko dakangaha.
