TURA: West Garo Hills a·jaoba COVID-19-ni batrikrikaniko warachakangkuna gita lockdown-ko ra·gatkuengon, manderangni namgnina adita niamrangko district administration taridape on·angaha.
Deputy Commissioner-ni u·iatani gitade, gital u·iataniko on·taikujaskal a·jani ning·o donggipa skul aro college-rangko chipe donangkugen indiba skul aro college-rangko chipe donengmiting somoio internet gita class-rangko ra·skana man·gen.
Dokkanrangko kuliani bidingo talataniko on·angengon, nangchongmotgipa dokkanrang, jekai galamal, dud, be·en, me·su aro uandakgipa dokkanrangko Sombar saloni Sonibar salona pring 8:00 bajioni attam 5:00 bajiona kulina man·gnok ine Deputy Commissioner u·iataha.
Non-essential ba nangchongmota ong·gijagipa dokkanrangkode Mongolbar, Budbar, Bristibar aro Sukrobar salrangosan pring 8:00 bajioni attam 5:00 bajiona kulina man·gen ine u·iataha.
Dokkanrangko kuliengon dokkano dongtimgipa ba dokkan nokgiparangni tika su·a su·gijaniko see tape donchina gitaba Deputy Commissioner u·iataha.
Garirangkoba odd/even nomboro pangchake re·rurana gita district administration, niamko donangkuaha aro Deputy Commissioner-ni u·iatani gitade, Sombar, Budbar aro Sukrobar salrango 2,4,6,8 aro 0 nomborchi bon·gipa garirang re·rurana man·gen aro Mongolbar, Bristibar aro Sonibar salrangode 1,3,5,7 aro 9 nomborchi bon·egipa garirang re·ruraskana man·gen.
Sorkari office-rangkoba, ma·mong sorkarini office-rangko man·chape West Garo Hills a·ja gimikon pring 10:00 bajioni attam 5:00 bajiona kulina man·gnok indiba kam ka·giparang 50 percent-na batna man·jawa ine DC parakataha.
Walantian attam 6:00 bajioni pring 5:00 bajionade corona curfew-ko ong·atangkugen aro Robibar salode a·jani pilak biaprangon chu·gimik lockdown-ko ra·gatangkugen ineba DC parakataha.