SHILLONG: Meghalaya Pradesh Congress Committee (MPCC)-ni president-ko seokkujaengani gimin bang·bata Congress MLA-rangan suk ong·tokjaenga ine kobor on·aha.
Congress MLA saksani kobor ra·timgiparangna parakatani gitade, MPCC-ni president-ko seokanio ru·uta somoirangko ra·chae dongengani gimin bang·bata Congress MLA-rangan suk ong·tokjaenga aro Meghalaya a·doko Assembly election-ko ong·atani somoi da·o bilsisa atamangsan dongaiahani gimin MLA-rang, ta·raken MPCC-ni dilgipako seokchina gita All India Congress Committee (AICC)-ko nangniktokengaha.
“Pilak political dolrangan da·o Assembly election-na tarisamtokengahani gimin MPCC-ni president-na Charles Pyngrope, Vincent Pala ba jekoba seoke on·china chinga AICC-ko nangnikenga,” ine Congress MLA, an·tangni bimingko parakatgija, kobor ra·timgiparangna aganaha.
Congress MLA-ni parakatani gitade, MPCC president-ni kamna nambatgipa mandeara Charles Pyngrope-an ong·engani gimin bang·bata MLA-rangan una chaktokenga aro president-ni kamna susaenggiparangoni saksa Ampareen Lyngdoh-ba da·o ia kamna susaanioni watgale Pyngrope-nan chakpaengahachim.
MPCC-ni gitcham president Dr Celestine Lyngdoh-na dongimin somoi, re·anggipa bilsion bon·ahani gimin gital president-ko seokani bidingo Congress dolni dilgiparang baksa agangrikna gita ia bilsini a·bachengachibara AICC-ni in-charge Manish Chatrath-ba Meghalaya a·dokona re·baahachim.
Chatrath-ni Meghalaya a·dokona re·baaoni da·o indita jarang ong·angpilahaoba MPCC-ni president-ko seokna gita AICC man·skakujaengachim.