TURA: North Garo Hills a·jani dingtang dingtang biaprango niam gri chalaienggipa saw mill ba bol ratani karkanarangko Forest official-rang chipataha.
Forest official-rangni u·iatani gitade, North Garo Hills a·jani Mendipathar aro Resubelpara jolrango niam gri bol ratani karkanarangko chalaienga ine koborko man·soenba, Bristibar salo, Dainadubi aro Kharkutta Forest Range-ni manderang, police-rang baksa nangrime am·sandiangaha aro uandaken ia jolrango niam gri chalaienggipa dambonga bol ratani karkanarangko rim·e chipatna man·aha.
Ia bol ratani karkanarangko chipatani ja·man Forest official-rang, ia mill-rango jakkalenggipa ma·manti bol ratani ostrorangkoba rim·e ra·angaha ine Forest official-rang kobor on·aha.
Garo Hills-ni dingtang dingtang biaprango iandake bol ratani karkanarangko chalaiengani a·selan manderang, bolrangko rate paltokengani gimin batanggimin somoirangoba Forest official-rang, iandake niam gri chalaienggipa saw mill-rangko sandie chipatengachim ine nikna man·a.
