TURA: All Garo Hills Joint Action Committee (AGHJAC)-chi re·dilenggipa Garo Hills-ni dingtang dingtang dolchi bakrimgimin NGO dilgiparang mni Sukrobar salo Meghalaya-ni chief minister, Shri. Conrad K. Sangma-ko Shillong-ni Main Secretariat-o grongeaha.
NGO-ni dilgiparang, Sangma-ko uni office-o grongenba state level aro national level-ni gita bilsiantio kamna porikkarangko ong·atchakani aro chukalgipa gadango poraina entrance examination centre, chong·motan, ‘common Examination Centre’-rangko Garo Hills-oba a·bachengatchina gita dabie uamangni memorandum-koba on·angjolaha.
Chief minister-ko gronge dingtang dingtang kamrangni bidingo agan-golpogrikdilanggipa NGO-ni dilgiparangara, All Garo Hills Joint Action Committee (AGHJAC)-ni adviser aro convener; Garo Students’ Union (Eastern Zone)-ni president, secretary aro vice-president; FAF (Northern Zone)-ni president; GSU, (Resubelpara Unit)-ni GS, GSU (CEC) H.Q. Tura-ni president; Garoland State Movement Committee (GSMC), Babadam Unit-ni chairman; GSU (Chibinang Unit)-ni secretary; GSU, Western Zone-ni president aro Publicity Secretary mangan ong·a.
AGHJAC-ni adviser aro convenor Shri. Roger Benny A. Sangma aro Shri. Balkarin Ch Marak mangni dilachi CM-ko grongani somoio nangrimgimin NGO-ni dilgiprang, Garo Hills-ni dingtang dingtang College aro University-rango poraienggipa chatro-chatrirang, central aro state level-ni gita ong·atenggipa porikkarang, chong·motan UPSC, SSC, RBI, IBPS, CDS, NDA, CET aro uandakgipa gipin porikkarangko sena gita a·dok gipinchi re·ange sena nangenga.
Uandake, Garo Hills-ni chatro-chatrirangba, chukalgipa gadango poraidapna gita uamangni JEE, NEET, UGC NET & CSIR aro uandakgipa gipin porikkarangko Shillong songjinmaona re·ange sena nangenga. Jean uamangna namen neng·nikbeani aro koros bang·e galna nangani ong·pilskaengani gimin, uamangni mikkangchini namgnina aro subitako ra·bana gita uandakgipa Common Exam Centre-rangkoba Garo Hills-ona ra·bae on·pachina gitaba NGO-ni dilgiparang dabiangaha.
Nangrimgimin NGO-ni dilgiparang jekon CM, Sangma-o dabiangahachim, uarangko Garo Hills-ni chadamberangni mikkangchini namgnina nigrike man·a dipet kamrangko chu·sokate on·a jotton ka·gen ine Sangma uamangna ka·donganiko on·atskaaha ineba koboro janapataha.
Apsandake, NGO-ni dilgiparang Meghalaya-ni Sports & Youth Affairs minister, Shri. Banteidor Lyngdoh-koba gronge, Garo Hills-ni chadamberangna Sports Academy-ko a·bachengate on·china gita dabiangaha.
Uandake, kal·susaanirangara pangnan Garo Hills-ni chadamberangni janggi tanganio mongsonggipa bak ong·ani gimin, aro A·chik jatrangni dingtang dingtang kal·susaaniba Games & Sports-ni bak ong·paani gimin, A·chik jatni bewalo kal·susaanirang, jekai, Sue goa, Gando Makkal pala, Wa·pong sika, Ja·kol Kal·a, An·dingsala aro uandake, Durubol ma·wea, Gostapgrika, Kilkok de·susaa, Wa·ambong sota, aro uandakgipa gipin kal·anirangkoba a·dokni mongsonggipa kal·susaani bak dake ra·chapchina dabiangjolaha.
Uarangsanba ong·aigija Garo Hills-ni nangrimgimin NGO-ni dilgiparang, kal·susaanio bakko ra·na nangnikgipa ba dingchikgipa A·chik chadamberangni namgnina Garo Hills a·jao dingtang dingtang nangani kri pilak kal·chakram biap ba nokrangko rike on·china gitaba sports minister-o dabiangaha ineba koboro janapaha.
