SHILLONG: Autonomous District Council (ADC)-rango traditional institution-rang dongani gimin village aro municipal council-ko songna nanganiko nikja ine HSPDP agangaha.
ADC-ni sason ka·gipa a·jarango tribalrangni dakbewalni kri traditional institution-rang dongani gimin Sixth Scheduled-ko taridapanio village aro municipal council-ko songna nangani dongja aro songnaba nangja ine HSPDP-ni padot KP Pangniang aganaha.
Ia apsankon chief minister baksaba chanchirimaha, aro chingni (HSPDP) iako nangnikgijaniko Chief Minister-na rongtalen aganaha aro uaba apsankon namnikpagen gita nika, Pangniang aganaha.
Songni gadango village council-ko aro ADC-ni biapo municipal council-ko donna nangja ineba HSPDP aganaha.
Indakeba nikatna man·a je, Anti-Defection Law, dilsa Finance Commission-ko songna gita Article 280 aroba ADC-rangna tangka paisani bidingo bilko on·na indakgiparangni bidingo Sixth Scheduled-ko taridapenga ine Chief Minister Conrad Sangma unaskang aganahachim.
GHADC-ni bidingo ua indakeba aganahachim je, council election, uandake village council election-rangko ong·atna gita mesoke on·na uamang chanchiaha, jeon JHADC aro KHADC-ode village Dorbar-an jako ra·angkugen aro election-koba taridapgimin law ba ainni para 2A-o janapgimin gita ja·rikanggen.
Uni aganani gitade, village Dorbar-na election-rangko ong·atna kam ka·na gitaba ADC-rangon chu·gimik bil dongna nanga.
Indake ong·engon, A·dokni ning·o municipal council-rangko chalaiani giminba mesoke on·na uamang chanchienga ine Pa Sangma agandapaha.
