SHILLONG: Raliang-oni National People’s Party (NPP) MLA, Comingone Ymbon, uni gitcham party Congress-ona re·angpiljawa ine talen parakataha.
“NPP baksa bakrime kam ka·naan Congress-oni ong·kataha, uni gimin Congress-ona re·pilangani kattaan dongja,” ine Ymbon, kobor ra·timgiparang baksa agangrikao parakaha.
Meghalaya Pradesh Congress Committee (MPCC) president Vincent H Pala-ni “Congress-ni gitcham dilgiparang, jemangan party-oni ong·katahachim uamangko rimbapilna jotton ka·gen’ ine agangipa kattana Raliang-oni NPP MLA, aganchakataha.
Cabinet-oniko ra·gala man·ani gimin, Ymbon, Congress-ona re·bapilnaba donga ine kobor jangbing-bangahachim.
“Jemangan party-oni ong·katahachim, uamangko jedakeba party-ona rimbapilna kam ka·gen ine Pala, aganaha. Una agreba MPCC-ni chief, Congress-ni gitcham MLA P.N Syiem baksa agangrikon party-ona re·bapilani kattako aganaha ineba parakaha. Unbaksana gipin party-ni dilgiparang jekai RG Lyngdoh aro Billykid Sangma- uamang baksaba agangrikgen ineba Pala agandapaha.
Indake ong·engon, NPP-ni national vice president aro Deputy Chief Minister Prestone Tynsong, Pala-ni agangipa kattarangna mamingkon aganchakna sikgijako parakatskaha.
