TURA: West Garo Hills a·jani Purakhasia jolo bilsiantian wachini somoio Darong chibima dal·bae chi banrongengon, ia chibimaoni chi joksrubaaniko champengna contractor sakbrini kam ka·anirang namja ine songni manderang aro job card-chi kam ka·enggipa manderang matnangenba, iani bidingo inquiry-ko dakchina West Garo Hills a·jani Deputy Commissioner-na sedoataha.
Deputy Commissioner-na badi ka·e sedoatgipa chittio, songni manderang aro songo job card-chi kam ka·e cha·enggipa manderangni parakatani gitade, wachini somoio ia chibima dal·bae chi bananiko champengsona gita uamang an·tangtangni MGNREGS hajirarangchi contractor sakbriko kam ka·atahachim indiba ia contractor-rang, kamrangko name ka·jahani a·sel chibimako kapenganirang be·gruna sie dongenga aro mikkangchi chi dal·bagenchimoba ia kapenggipako chi man·angani cholrang dongengachim.
“Ia chibimako kapenganio uamang namgijagipa cement-rangkosa jakkalaha aro niam gita kamrangko ka·jaha. Ia chibimako kapengna pangchakaniko songaniba chu·onga gita tu·e tarijaha aro da·on ia pakmarango bretanirangko nikna man·engaha,” ine songni manderang parakatenba, mikkangchi ia Darong chibima dal·baahaode ia pakmarang be·gruani cholrang dongenga ine talatangaha.
Songni manderang an·tangtangan an·tangtangni tangka paisarangko on·e kam ka·atahaoba contractor-rang chu·ongnika gita ong·gija kamrangko ka·aha ine janapatengon, songni manderang noksan ong·jana gita ia kamni bidingo ta·raken inquiry-ko dakchina aro nanga gita ja·kurangko de·china, West Garo Hills a·jani Deputy Commissioner-ko didiataha.