TURA: Game ge·e cha·giparangna tangka paisa aro dingtang dingtang cholrangchi dakchakanirangko on·na a·dok sorkarini ra·gatgipa Farmer’s Collectivization for Upscaling Production & Marketing Systems (FOCUS) program-ko Budbar salo, East Garo Hills a·jani Samanda block-oba a·dokni Chief Minister Conrad K Sangma-ni jakchi a·bachengate on·angaha aro ia program-ko a·bachengate on·angani somoio Williamnagar-ni MLA aro a·dok sorkarini Chief Whip Marcuise Marak-ba dongpae bak ra·angaha.
Samanda block-o ia FOCUS program-ko a·bachengate on·angani somoio a·dokni Chief Minister, jinmana aganprakangengon, Meghalaya a·doko 70 percent-ni gitade gama ge·ani kamrango pangchake janggi tangenggiparangan ong·genchimoba game ge·e cha·giparang, dingtang dingtang program-rangoniko nanga gita dakchakanirangko man·jaenga aro uandaken sorkari, a·doko game ge·e cha·enggipa manderangna dakchakanirangko on·na gita miksonge ia FOCUS program-ko ra·gataha ine parakangaha.
Ia FOCUS program-ko a·bachengatani bidingo talataniko on·angengon, game ge·e cha·giparangna pala sim·ani cholrangko on·e a·doko gama ge·ani kamrangko tang·doatna gita sorkari, ia program-ko a·bachengataha ine Chief Minister parakangaha.
Chief Minister-ni aganani gitade, a·doko game ge·e aro bading chiwale cha·enggipa manderangko ‘producers group’-rangko bikotate a·dok sorkari, ia program-ni ning·o tangka paisarangko on·e dakchakenga.
“Ia program-ni ning·o game ge·e cha·gipa mande sakantinan gong 5000 ka·e sorkari on·gen indiba game ge·e cha·giparang ‘producers group’ dolrango bimingko segatna nanggen,” ine Chief Minister aganaha.
Ia FOCUS program-ni ning·o game ge·e cha·enggiparangna sorkarini on·enggipa tangka paisarangara sudna on·enggipa tangka paisa ong·ja indiba game ge·e cha·enggipa manderangni gama ge·ani kamrangko tang·doatna gita sorkarini dakchake on·anisa ong·enga ineba Chief Minister parakataha.
Ia FOCUS program-na a·dok sorkari gong kror 200 tangkarangko chame donmanaha aro ia tangka paisarangko re·baenggipa bilsirangni gisepon jakkalgen ineba Chief Minister parakataha.
Samanda block-o ia FOCUS program-ko a·bachengate on·angani somoio East Garo Hills a·jani dol 35 producers group-rangna dingtangmancha Chief Minister-ni jakchi cheque-rangkoba suale on·angjolaha.