TURA: Lok Sabha-ni gitcham Speaker aro Tura-ni gitcham MP Purno A Sangma sagini chang 74-gipa atchiani salko maniani bak gita Budbar salo, a·dok sorkarini ra·gatgipa Farmers’ Collectivization for Upscaling Production & Marketing Systems (FOCUS) program-ko South West Garo Hills a·jani Rerapara block-oba a·bachengataha aro ia program-ko a·bachengate on·anganio South West Garo Hills a·jani Additional Deputy Commissioner SK Marak, Rerapara Block-ni BDO RZD Shira aro gipin officer-rangba dongpae bak ra·angaha.
Ia FOCUS program-ko a·bachengate on·angani somoio Rerapara block-ni ning·o donggipa dol 23 producers group-rangna gimik gong 15,70,000-ni cheque-rangkoba suale on·angjolaha.
Iani ja·mano dingtang dingtang department-rang, jekai Horticulture, Agriculture, Veterinary & Animal Husbandry aro uandakgipa department-ni official-rang, dingtang dingtang producers group-rang baksa agangrike, sorkarini on·enggipa dingtang dingtang cholrangni bidingo talate on·angskaaha.