SHILLONG: Bristibar salo Meghalaya a·dokni Chief Minister Conrad K Sangma aro Meghalaya Legislative Assembly-ni Speaker Metbah Lyngdoh, a·songni Prime Minister Narendra Modi-ko grongeaha.
A·songni Prime Minister-ko grongani somoio a·dokni Chief Minister aro Assembly-ni Speaker, re·baenggipa 2022 bilsini January 21 tariko Meghalaya a·dokni bilsi 50 gapaniko manianiona re·bae bakko ra·echina gita dingtangmancha Prime Minister-ko didiangaha.
Shillong songjinmani Mawdiangdiang-o rikenggipa Meghalaya Legislative Assembly-ni gital building-ko matchotatna man·na gita tangka paisarangko on·e dakchakatchina gitaba a·dokni dilgiparang, Prime Minister Modi-ko didiangjolaha.
Meghalaya Legislative Assembly-ni gitcham nokko 2001 bilsio wa·al kamgopaoni da·o bilsi 20 batangpilengahaoba gital building-ko da·onan man·kujaengachim.
Meghalaya a·dokni dingtang dingtang sorkarirang, Assembly-ni gital building-ko rikna gita dingtang dingtang biaprang jekai Police Bazar, Mawdiangdiang, Upper Shillong aro Tara Ghar-ko minge donahaoba da·o ia building-ko Mawdiangdiang-o rikskaengahachim.
Gital Assembly nokko rikani kamrang matchotangengahani gimin ia gital building-ko re·baenggipa 2022 bilsini Budget Session-na skangde matchotnaba gnang ine adita salrangna skangsan Assembly-ni Speaker Metbah Lyngdoh parakatahachim.
