SHILLONG: East Guwahati Police District-ni dolsa sipairang, Meghalaya Police baksa nangrime, drugs ba sam badinggipa me·chik saksako Budbar salo, Shillong songjinmaoniko rim·aha ine kobor on·aha.
Re·anggipa August-ni 26 tariko Mizoram a·dokoni drugs badinggipa me·chik saksako rong 8500 Yaba tablet-rang baksa Guwahati songjinmani Bhangagarh-oniko rim·na man·ahachim aro uandaken ja·mano ia me·chikni parake on·anichi, Baptist Church sambao donggipa Madanriting Block F-oni bilsi 33 ong·gipa Dimsiannem-koba police-rang Budbar salo rim·na man·aha.
“Uko (Dimsiannem) Bhangagarh Police Station-ona rim·baaha aro uoniko mobile ge 3 baksana gong 35,60 tangkarangko rim·aha. Drugs badinganio jak donggipa gipin manderangkoba police-rang rim·na sandiengkua,” ine Bristibar salo Assam Police-rang kobor on·aha.
Police-rangni u·iatani gitade, Mizoram a·dokoni sam badinggipa Khumi Khawung (45), Shillong-oni Guwahati-ona re·ange Bhangagarh-o donggipa Kunjalata Lodge-o dongengachim. Ia me·chikko rim·ani ja·man police-rang, uni dongchakgipa kuturioniko sandion, rong 8500 Yaba tablet-rangko man·ahachim. Ia me·chikko police-rang sing·sandienba ja·mano Shillong-oni me·chik saksako rim·dapna man·aha ine u·iataha.