SHILLONG: A·dokni Chief Minister Conrad K Sangma, dingtang dingtang kamrango jakchakkujaengani a·sel Meghalaya State Commission for Women (MSCW)-ni gital dilgiparangko songanio ja·manchakengkua.
Robibar salo official-rangni kobor on·ani gitade, MSCW-ni gital chairperson aro gipin membor-rangko songna gita Search & Select Committee (SSC), sak 10-mangni bimingko sorkarina on·atmanaha.
Ia file-ko SSC-ni chairman aro Social Welfare department-ni Commissioner & Secretary MN Nampui ra·chakmanaha aro da·o ia file, Social Welfare Minister Kyrmen Shylla-ni jako ong·enga ineba official-rang parakataha.
MSCW-ni gital dilgiparangko seokani bidingo chanchirimna gita Chief Minister-ni tom·aniko ong·atanina Social Welfare Minister sengengkua ineba official-rang aganaha.
“Chief Minister choljokkujaengani gimin MSCW-ni gital dilgiparangko songanio somoiko nangkuenga. Ia commission-ni gitcham dilgiparangna dongimin somoi re·anggipa bilsini October jaon bon·ahani gimin gital dilgiparangko ta·raken songna sorkari nangnikenga,” ine official-rang aganaha.
MSCW-ni chairperson aro gipin membor-rangko songanio somoiko nangengani gimin adita salrangna skangsan Assembly Committee on Women Empowerment (ACWE)-ba a·dok sorkariko sing·doangahachim.