SHILLONG: (UNI) Assamni Karbi Anglongo dolbonga bobil dolrang baksa Ma·mong, tom·tomanina agangrikaniko dakna gita soi ka·grikengon, Meghalayao bobil dake chakatgipa HLNC bobil dolnaba adita ka·dongsoani chinrang nikna man·aha.
Meghalaya a·doko bobil dake chakatgipa Hynniewtrep National Liberation Council (HNLC), re·anggipa somoi salrango IED bomarangko gopretataha, jeon rongsakode Shillong songjinmani Laitumkhrah bajaro gopretatahachim, unbaksana tangka dabiani lekkarangkoba bading-chiwalgipa aro politician-rangnaba on·ahachim.
A·doko pangkamgipa tom·tomaniko ra·bana gita Sorkari champengako man·gipa HNLC baksa tom·tomanina agangrikna nanga ine BJP-ni a·gipi dilgipa AL Heka aganaha. Re·anggipa jao, bame on·gimin HNLC-ni gitcham general secretary Cherishstarfield Thangkhiew-ni, police-ni jako so·ota man·gipani bidingo aganengon, police aro sorkariko, Taliban-ni bewalko ja·rika gita nika, jekon songsalo ra·chakna man·jae golmalrang ong·angaha ineba Hek aganaha.
Cherish Starfield Thangkhiew bobil dolni membor ong·jahachim. Ua skangon sorkarina bame on·manaha aro ramram mande gitan name janggi tangengahachim, indiba indakgipa mandeko Taliban-ni bewal dake so·otaha ka·saninggija so·otaha indakgipa kamko anga raken jegala ineba Hek suk ong·gijaniko aganaha.
Apsandake cabinet minister Sanbor Shullai, HNLC baksa tom·tomanina agangrikaniko dakchina gita Ma·mongni Home Minister Amit Shah-ko gronge mol·molahachim ine nikatna man·a.
