RESUBELPARA: Prime Minister Employment Generation Program (PMEGP)-ni bidingo songni nokni manderangna agan-talate on·na gita re·anggipa Budbar salo, North Garo Hills a·jani District Commerce & Industries Centre (DCIC)-ni gita awareness program-ko Bajengdoba jolo donggipa Bolsong Songma-o ong·atangaha. Ia program-ko ong·atanio PMEGP baksana DCIC-ni ning·o man·enggipa gipin scheme-rangni giminba songni nokni manderangna agan-talate on·angaha.
Ia awareness program-ko ong·atanio Bajengdoba C&RD Block-ni BDO Ripamchi N Sangma, mongsonggipa sokgipa ong·e jinmana aganprakangengon, PMEGP scheme-ni ning·o mai dakgipa namgnirangko ra·na man·achim, uarangni bidingo manderangna talate on·angaha.
Bida budi dongeba kamgri ong·e dongenggipa chadamberangko bading chiwalanirangko dake cha·china didianiko on·angengon, dingtang dingtang vocational training-rango jakni kamrangko skie ra·enba, PMEGP scheme-ni ning·o dakchakanirangko ra·china Sangma didiangaha.
Ia sal somoirango sorkarini kamrangko man·na neng·engahani gimin iandakgipa scheme-rangan chadamberangna janggi tangani cholrangko on·na dakchakenga ineba Bajengdoba-ni BDO parakangaha.
Ia program-ko ong·atanichi kamgri ong·e dongenggipa chadamberangko bading chiwalanirangko dake cha·na dakchakani ong·gen ineba Sangma, an·tangni ka·dongchakenganiko parakangaha.
Dingtang dingtang scheme-rangni ning·o tangka paisani gita dakchakanirangko on·engani gimin talatangengon, loan-rangko somoi gita gamskachina ua loan ra·gipa manderangko didiangaha.
Covid-ni a·sel lockdown-ko ra·gatna nangaha ine janapatengon, lockdown-ni somoirango bang·a manderangan, an·tangtangni changa sapanirangko jakkale tangka paisarangko kamaina cholko man·skaaha ine Sangma parakataha.
Ia program-ko ong·atanio dongpae jinmana aganprakanggipa gipin manderangara, North Garo Hills DCIC-ni General Manager AZ Wreang, DCIC-ni Functional Manager Nethaji R Marak, DCIC-ni IPO AD Shira aro gipinrang ong·a.
Sukrobar salo, DCIC-ni ning·o man·enggipa dingtang dingtang scheme-rangni bidingo apsan dakgipa program-ko Resubelpara-o ong·atangskagen ineba ia tom·anio jinmana parakataha.
