Shillong: Meghalaya SSA School Association (MSSASA)-ni mejal Robibar salo u·iatani gitade, uamangni bang·a dabianirangko a·dok sorkari knachakjaengani a·selo, uamang knal Mongolbar salo a·dok sorkarini kosako jegale jingjengatnasienga.
MSSASA-ni president, Aristotle Rymbai-ni koborna u·iatengon, a·dok sorkarini kosako uamangni asonge jegale jingjengataniko knal Mongolbar salni 2 pm bajioni attam 5 pm bajiona Malki-ni kal·chakram biapo tom·tome ong·atangskagen.
Rymbai, uamangni tom·tome asonge jingjengatanio bakko ra·pachina gita dingtang dingtang SSA skigiparangko uamangni salantio ka·ronga gita kamrangko ka·genchimoba, uamangni namgnina dabianio bakko ra·pachina gita didiataha.
A·dok sorkarini gita uamangni dingtang dingtang dabianirangko knachakjaengani gimin, ua an·tangni kusi ong·gijako parakatengon, Rymbai, “chingni dabigiparangoni mongsongbatgipa mingsara, chingna dormaha on·ani niamko tarichina aro a·dokni sak 12,541 SSA teacher-rangni man·gnigipa dormaharangko jaantion altue on·skachina dabianian ong·enga,” ine aganaha.
“Chinga RTE Act, 2009 aro SSA RTE-ni niamrango pangchake, a·dokni sak 12,541 SSA teacher-rangko State Implementation Society (SIS) ine jako ra·engaoniko Education department-o napate regular teacher dakatskachina dabienga,” ineba Rymbai agandapaha.
