TURA: Gambegre Block-ni ning·o donggipa Purakhasia ramani obosta namsrangjaengahani a·sel re·ruraenggipa manderang neng·nikanirangko chagrongna nangtokenga ine Garoland State Movement Committee (GSMC) parakatenba, ia ramako ta·raken taripile on·china gita a·dok sorkari aro PWD official-rangko didiataha.
GSMC Headquarter Tura-bni additional general secretary Bostone M Sangma-ni parakatani gitade, ia ramako Tura-ona re·baenggipa Purakhasia jolni manderang aro Purakhasia anti cha·na re·rongenggipa Chenggapara, Jebalgre, Dopogre, Semingpara, Rakwapara, Bendikgre, Sandagre, Chollongpara, Tochapara aro uandakgipa songni manderang re·rurana jakkaltokengachim indiba da·o ia ramani obosta namsrangjaengahani a·sel Tura-ona re·ruraenggipa, Purakhasia anti cha·na re·enggipa aro skulrangchi re·ruraenggipa chatro chatrirangba neng·nikanirangko man·tokna nangengahachim.
“Ia ramani obosta namsrangjaengahani a·selan da·o chonchongipa garirangde ia rama gita re·na man·jaengaha. Uni gimin jolo songdongenggipa manderangni namgninasan ong·aigija ia rama gita re·ruraenggipa pilakni namgninan ia ramako ta·raken taripile on·china chinga mol·molenga,” ine GSMC-ni addl general secretary parakataha.
