TURA: Baghmara-ni Captain Williamson Memorial Government College-o tika su·kugijagipa chatro chatrirangko class-rango napna on·jaengani gimin jegale adita salrangna skang, jingjengatanio bak ra·gipa chatro chatrirangoni chatro saksamangmangna notice on·aniko Baghmara-ni Constitutional Rights’ Forum (CRF) raken jegalataha.
South Garo Hills a·jani Captain Williamson Memorial Government College-o COVID-19-ni tika su·kugijagipa chatro chatrirangko class-rango napna on·jaenga inenba re·anggipa Mongolbar salo, Constitutional Rights Forum-ni dilanichi college-o poraienggipa chatro chatrirang, college a·palo jegalanirangko dakangtokahachim aro iani bidingo ia college-ni principal, ia jingjengatanio bak ra·gipa chatro saksana sasti on·ani bak gita an·tangni ma·a paako college-ona rimbachina notice-ko on·angaha.
CRF-ni u·iatani gitade, ia notice ba ge·etaniko ia college-ni 5th semester-o poraienggipa Arts student Nikjrang A Sangma-na September 21 tariko on·ataha aro uni ma·a paako re·baenggipa September-ni 28 tariko college-ona rimbachina gita college-ni principal ge·etaniko on·ataha.
Indake ong·engon, jegalanio bak ra·gipa chatro chatrirang sak 300-na baten donggenchimoba maini gimin ia chatro saksamangmangnasa ia notice-ko on·aha ine CRF-ni dilgiparang, college-ni principal-o sing·doangskaaha.
“Ia jingjengatanio sak 300-na baten chatro chatrirang dongpae bakko ra·aha indide maini gimin ia chatro saksamangmangkosan college-ni dilgiparang sasti on·enga?” ine CRF-ni president Ricky D Shira sing·doataha.
An·tangtangna on·gimin bilo pangchakesa tika su·kugijagipa chatro chatrirang, ia college-ni kosako jingjengataha aro iani gimin chatro chatrirangko sasti on·na man·ja ineba CRF parakataha.
College-o poraienggipa chatro chatrirang maming neng·nikani gri an·tangtangni test report-rangko mesoke class-rango dongpana man·na gita manderangna RT-PCR test-ko indin on·skana nanga ineba CRF dabiangaha.