TURA: West Garo Hills a·jani Sakal A·duma songo Tura Christian Hospital-ni Community Health Nursing Centre-ko rikna gita adita salrangna skang, pangchakaniko songe on·angaha.
Ia Community Health Nursing Centre-ko Sakal A·duma songo rikna gita kamrangko A·chik Heritage Pursuits (AHP) dolni gita chanchidilchengaha aro uamang da·o Tura Christian Hospital baksa nangrime ia centre-ko rikna kamrangko a·bachengataha.
Ia Community Health Nursing Centre-na pangchakaniko A·chik Baptist Dal·gipa Krima (ABDK)-ni General Secretary Rev Janang R Sangma, songe on·angaha aro ia pangchakaniko songe on·angani somoio Tura Christian Hospital-ni Medical Superintendent Dr Jedidah N Marak, Associate Medical Superintendent Dr Editha W Momin, Tura Christian Hospital ADMC-ni Chairman Dr CB Sangma aro ia centre-na a·ako on·gilgipa Poljonsing M Sangma-ba dongpae bak ra·angaha.
Koborko on·ani gitade, ia training centre-o bilsi bongani outreach program-ko ong·atangchenggen aro uni ja·mano ia training centre-ko sub-centre-ona ra·doatgen.
Ia training centre-ko rikanio A·chik Heritage Pursuits dol dakchake on·anggen ine u·iatengon, ia songo training centre-ko rikanichi jolo songdongenggipa manderangna sanna bananirangko on·na gitaba dakchakani ong·gen ine AHP dolni president Prakash Momin, an·tangni ka·dongchakenganiko parakataha.
“Ia jolrango songdongenggipa manderang, km 22-mang chel·ao donggipa Asanang-onasa re·ange sanna bananirangko ra·na nangengani gimin ia songo ia training centre-ko rikaniara, ia jolrango donggipa songrang, chong·motan Daribokgre, Mandal Nokat, Sakalgre, Baladinggre, Dura Kalakgre, Sasatgre, Chandigre aro Oragitok songrango songdongenggipa manderangna namgni ong·gnok,” ine Momin parakataha.
