SHILLONG: Mongolbar salo Shillong songjinmani Raj Bhavan-o Investiture Ceremony-ko ong·atangaha aro ia tom·aniko ong·atanio Assam Rifles-ni sak 44 sipairangna a·dokni Governor Satya Pal Malik-ni jakchi, Gold aro Silver medal-rangko on·angaha.
India a·songni salgro salaram a·dokrango biaprang namen ga·nangjabegenchimoba, an·tangtangko on·kange a·songna dangdike on·engani gimin ia medal-rangko Assam Rifles-ni sipairangna on·angaha.
Assam Rifles-ni sipairangna medal-rangko on·ani somoio a·dokni Governor Satya Pal Malik, jinmana aganprakengon, 186 bilsina kingking Assam Rifles, a·songko chel·chakaha aro mikkangchiba a·songko warachakangkugen ine mittelpile aganangaha.
A·songna dangdike on·anio an·tangtangni janggirangko on·kanganggipa Assam Rifles-ni sipairangnaba ia salo dingtangmancha a·dokni Governor, mande ra·pilskaaniko dakangaha.