SHILLONG: Congress Legislature Party (CLP)-ni dilgipa Mukul Sangma aro uni gisepo maming meligrikgijani dongja indiba high command baksasa adita meligrikgijanirang donga ine Meghalaya Pradesh Congress Committee (MPCC)-ni president Vincent H Pala parakataha.
Pala-ko MPCC-ni president songchengaonisa Congress dolni ning·o meligrikgijanirang a·bachengaha ine matnanganirangko knasona man·ani ja·man ia kattarangko MPCC-ni president talatangaha.
“Angni nikani gitade CLP-ni dilgipa aro angni gisepo maming dingtanggrikani ba meligrikgijanirang dongja. Anga CLP-ni dilgipa baksa agangrikaha aro ua MPCC-ni president-ko seokanio unbaksa agangrikchengjahani giminsa suk ong·ja gita dakenga. Uni gimin ua angbaksade maming meligrikgijani dongja indiba high command baksasa ong·enga,” ine PEC tom·ani ja·man Pala aganaha.
Uamang sakgnini gisepo meligrikgijani donga ine agananide ong·jawa maina high command-ni ge·etaniko party-sa ja·ku de·aha ineba ua aganaha.
Mawryngkneng, Mawphlang aro Rajabala by-election-ko ong·atna sienggipani gimin janapatengon, iade una dake niani gita ong·jaenga indiba 2023 bilsini Assembly election-sa una asol dake niani gita ong·gen ine MPCC-ni president parakataha.
Mukul aro uni manderang Congress doloni ong·katna miksongenga ine kobor on·anikoba Pala jegalataha.