TURA: Rajabala Assembly constituency-ni by-election-koba re·baenggipa October 30 tariko Mawryngkneng aro Mawphlang constituency baksa apsan ong·atna siengon, Rajabala by-election-na Congress dolni tikitko sianggipa MLA Dr Azad Zaman-ni jikgipa Hasina Yasmin Zaman-na on·naba gnang ine Congress doloni koborko on·aha.
Kobor on·timgiparangni u·iatani gitade, Rajabala by-election-na tikitko sianggipa MLA-ni jikgipana on·na gita Meghalaya a·doko Congress dolni dilgiparang miksongenga indiba da·o iana All India Congress Committee (AICC)-ni ra·chakaniko sengengkua.
“Sianggipa MLA-ni jikgipa saksa skia man·gipa aro kamni gimin u·i-ma·sigipa ong·a aro uan Congress dolni candidate ong·na krabatgipa ong·engachim. Una tikitko on·genchimode ua chu·sokgipa ong·aigen ine chinga ka·dongenga,” ine Congress doloni kobor on·timgiparang parakataha.
Rajabala by-election-o susana gita Rajabala-ni gitcham MLA Ashahel D Shira-ba Congress-ni tikitna susaskaengachim ine nikna man·a.
2018 bilsini Assembly election-o Shira, Dr Zaman-ni jako amako man·rikahaoba ia chang by-election-ode chegipa ong·gen ine ka·dongsoskaengachim.