AMPATI: India a·songni hospital-rango chu·onga gita oxygen-rangko donchina Prime Minister Narendra Modi-ni ge·etaniko on·angani ja·man, munite-prako litre 500 chipna man·gipa PSA Oxygen Generation Plant-ko Bristibar salo, South West Garo Hills a·jani Deputy Commissioner Ch Ramakrishna, Ampati Civil Hospital-o kulie on·angaha. Ia PSA Oxygen Generation Plant-ko PM Cares-ni gita on·aha aro ia oxygen plant-ko kulie on·angani somoio South West Garo Hills a·jani District Medical & Health Officer Dr LS Marak, Ampati Civil Hospital-ni Medical Superintendent Dr JS Momin, Tura Health Engineering Wing-ni SDO CM Sangma, Krima VI-ni Associate Executive Secretary WG Sangma, dingtang dingtang medical officer-rang aro Ampati Civil Hospital-o kam ka·enggipa manderangba dongpae bak ra·angaha.
Ia oxygen plant-ko kulie on·angani somoio South West Garo Hills a·jani Deputy Commissioner, jinmana aganprakangengon, iandakgipa bosturangko altue man·genchimoba jakkalgija dongenchimode maram cha·rongaia ine ia oxygen plant-ko name jakkalchina gita Civil Hospital-ni dilgiparangko didiangaha.
Krismas aro Bilsi Gital-ni somoirangode Garo Hills-o manderang jinma jinma manirongani gimin ia somoina skangan bang·bata manderangko tika su·e ra·na nangengani gimin janapatengon, COVID-19 tikani bidingo manderangni ma·sisretaniko chel·atna man·na gita dingtang dingtang toromni dilgiparangko aro mondolini dilgiparangko dakchakchina gita Deputy Commissioner didiangaha.
Ia oxygen plant-ko kulie on·angani somoio South West Garo Hills a·jani DM&HO Dr LS Marak-ba jinmana aganprakengon, a·song gimikon oxygen generation plant-rangko tarie on·ahani gimin India sorkariko mittelpilangenba, da·ode pilak hospital-rangon oxygen plant-rang dongahani gimin manderangna nambate sanna bananirangko on·na man·gnok ine parakangaha.