TURA: West Garo Hills District Magistrate, C N Sangma, skango on·gipa hukum gita apsan champengatani aro watanirang baksa champengatanirangko district-o October 18-ona ra·dodapani hukumko on·aha.
Hukumni gita district-o pilak dokkanrang da·o Sombar-oni Sonibar-ona wal 9 bajiona kulina man·gnok aro private gari salgiparang chu·gimik 100%-an salna man·aignok. A·dok aro ma·mong sorkarini office-rang da·o pring 10 bajioni attam 5 bajiona 100% chu·gimikan ka·na nanggnok ine hukumo janapaha.
District-o corona curfew walantian wal 11 bajioni pring 5 bajiona ong·angkugen. Antio salsa cha·gipa anti-bajarrangko West Garo Hills-o bajar cha·na wataignok.
Indake ong·engon, district-o Covid-19 sabisi man·anirang komiangaha, West Garo Hills District Magistrate, antio salsa cha·gipa bajarrangko bajar cha·na covid-na dongimin niamrangko raken ja·rikan baksa cha·china on·a hukumko pass ka·aha.
Pilak badingchiwalgiparang aro pale-sime cha·giparang uamangni biji su·a man·ani lekkarangko mesokna aro mask-rangko gana nanggen, dikdiksana tarigipa neng·takani aro dokkanrang saksa sakgipinoni meter 2 chel·e dongna nanganiko ja·rikna nanggen, palgiparang aro bregipa napna dongimin niamrangko ja·rikna nanggen, hukumo janapaha.
Bijolini bostu, plastic, ba·ra aro kancha, jakkalgimin ba·rarangko man·chape palna aro bajar committee-rangni president aro secretary-rangko Covid-19 niamrangko ja·rika-ja·rikja uko nirokangchina hukumo janapan baksana ge·etaha.
