TURA: South Garo Hills a·jao donggipa Baghmara MeECL sub-division office-ko chu·gimik divisional office-ona ra·doatchina gita didie, Garo Students Union (GSU) Mindikgre unit-ni president Greneth M Sangma, MeECL-ni Chairman aro Managing Director (CMD) RV Suchiang-na sedoataha.
MeECL-ni CMD-na sedoatgipa chittio Greneth-ni parakatani gitade, South Garo Hills a·jako songa bakan Baghmara-o MeECL-ni sub-divisional office-ko songahachim indiba da·onan ia office-o kam ka·giparang chu·ongjae kamrangko ka·anio maming namdapanirangko nikna man·kujaengachim. Ia office-na executive engineer-ko songe on·ahaoba Baghmara MeECL office-o biaprang dongjae, ia office-ni engineer, Williamnagar office-onisa kamko ka·skaenga ineba GSU Mindikgre unit-ni president parakataha.
Baghmara-ni MeECL sub-divisional office-ko sub-divisional officer-ni ning·o chalaienga indiba ia office-o kam ka·giparang, emergency duty-ni lineman sakgittamko man·chape gimik sakchet lineman-rang aro a·palni kamna mande sakbongasan kamko ka·enga ineba Sangma parakataha.
Ia office-o emergency-ni kamrangko ka·enggipa manderangna gari gorang dongjani a·selan, South Garo Hills a·jani badiaba biaprango bijolirang nosto ong·genchimoba kam ka·giparang ua biaprangona re·a doanirango neng·nikanirangko chagrongna nangenga ineba GSU Mindikgre unit-ni president parakataha.
Baghmara-ni MeECL sub-divisional office-ko chu·gimik divisional office-ona ra·doatna nangengahachim ine janapatengon, ia office-o kam ka·enggipa executive engineer-na nokko rike on·china, Mindikgre, Erenggre, Emangre, Karukol aro Panda jolrango emergency-ni kamrangna lineman sakgni ka·e rakkichina aro emergency-ni kamko ka·enggipa manderangna komibeoba gari bolgniko on·china gita Sangma, MeECL-ni CMD-ko didiataha.