SHILLONG: Batanggimin konta 24-ni gisepo Meghalaya a·doko sak 52 manderang COVID man·daptaiaha aro sak 76 manderang COVID-oni nampilskaaha, unomitingo sakgni manderang COVID sabisini a·sel sakgni manderang uamangni janggirangko gimaataha, uamangoni saksade tikka su·kujachim. Sigiparang saksa East Khasi Hills-oni aro saksara West Jaintia Hills district-oni ong·achim.
Mijal salni bako East Khasi Hills-o sak 19, Ri-Bhoio sak 2, South West Garo Hills-o sak 1, South West Khasi Hills-o sak 1, West Garo Hills-o sak 1, West Jaintia Hills-o sak 1 aro West Khasi Hills-o sak 27, gimik sak 52 manderang COVID man·dapaha.
Batanggimin konta 24-ni gisepo East Garo Hills-o sak 1, East Khasi Hills-o sak 48, Ri-Bhoio sak 7, West Jaintia Hills-o sak 2 aro West Khasi Hills-o sak 18, gimik sak 76 manderang COVID-oni nampilaha.
Meghalaya a·doko COVID sabisiko man·giparang mijalo gimikchide sak 83,210 gapangaha, uamangoni sak 81,034 manderang COVID-oni nampilaha, sak 1,441 siangaha, COVID sagiparang a·doko da·oba sak 735 dongkuenga.