Tura-ni MCH-o doctor-rang name kam ka·jaenga ine BJP, MCH officer-na badi ka·a

TURA: Tura-ni Maternity & Child Health (MCH) hospital-o kam ka·enggipa doctor, nurse aro gipinrang, sagipa manderangko ka·saninggija dake jakkalengani a·sel hospital-o sanna bananiko ra·na re·baenggipa manderang neng·nikanirangko man·tokna nangenga ine BJP Tura City District Committee-ni ning·o donggipa Mahila Morcha, West Garo Hills a·jani District Maternity & Child Health Officer (DM&CHO)-na badi ka·doangaha.
DM&CHO-na badi ka·doanggipa chittio Mahila Morcha-ni district president Rakhi K Sangma-ni parakatani gitade, hospital-ona sanna bananiko ra·na re·baenggipa manderangko hospital-o kam ka·enggipa doctor, nurse aro gipin kam ka·giparang, ka·sae nirok sandijaengani a·sel songadam nokadamrangoni re·bapaenggipa manderangde neng·nikanirangko man·na nangtokengachim.
“Ia hospital-ara an·o donggipa me·chikrangna aro bi·sarangna miksonge sorkarini on·gipa hospital-sa ong·ani gimin songadam nokadamrangoniba sanna bananirangko ra·na re·batokenga indiba hospital-o kam ka·giparangan uamangna ka·sae dangdike on·jagenchimode uamango maming ka·donganirang dongjawaha,” ine BJP Mahila Morcha-ni president parakataha.
MCH hospital-o sonography machine donggenchimoba bang·bata changon sonography dakna nangenggipa manderangko private clinic-rangonasa watatengani a·sel cholgri ong·pagipa manderangde neng·nikanirangko chagrongna nangtokenga ineba Mahila Morcha-ni district president parakataha.
“Cholgri ong·pagipa manderangde an·tangtang chol ong·janan sorkari hospital-rango ka·donge re·baenga indiba uamangko private clinic-rangonasa watatgenchimode sorkari hospital-rangko donani maming namgni dongjaenga,” ine Mahila Morcha-ni district president Rakhi K Sangma parakataha.