TURA: Raksamgre primary health centre (PHC)-o doctor dongjaengani a·sel songni nokni manderang neng·nikanirangko chagrongna nangtokenga ine All India Garo Union (AIGU) parakatenba, ia PHC-na doctor saksako songe on·atchina West Garo Hills a·jani District Medical & Health Officer (DM&HO)-na sedoataha.
AIGU-ni president John Pillar A Sangma-ni parakatani gitade, Raksamgre PHC-ni gitcham doctor-ko gipin biapona kam ra·jitangaonin Raksamgre PHC-na gipin doctor-ko songe on·taia dongkujaengachim aro iani a·selan songni nokni manderang sao ding·oba dingtang dingtang biaprangonasa re·ange sanna bananirangko ra·skana nangengachim.
Iana skang, GSU aro GSMC dolrangba Raksamgre PHC-o doctor dongjaengani gimin an·tangtangni suk ong·gijaniko parakatenba, ia PHC-na ta·raken doctor saksako on·atchina gita sorkariko didiatahachim ine nikna man·a.