TURA: October-ni 30 tariko ong·atenggipa Meghalaya a·dokni damgittam Assembly constituency-ni by-election-na campaign ka·ani mijal Budbar attamchibara matchotangaha aro ia bon·kamgipa salo, National People’s Party (NPP), Congress aro gipin candidate-rangba, ia damgittam constituency-ni dingtang dingtang biaprango tom·anirangko ong·atenba,
an·tangtangna pu·ongiparangko salna gita bilakbee campaign-ko ka·chotangaha.
Rajabala constituency-o Congress aro NPP dolgni, bilakbate campaign-ko ka·angaha aro dolgnian dolskako matnange pu·ongiparangko salna jotton ka·angaha.
Campaign ka·ani bon·kamgipa salo, a·dokni gitcham chief minister aro Opposition dolni dilgipa Mukul Sangma-ni dilanichi Congress dolni tom·aniko Rajabala songon ong·atangaha aro ia tom·anio Congress dolni dingtang dingtang dilgiparangba dongpae, Congress dolni candidate Hashina Yasmin Mondal-na campaign ka·angtokaha.
Ia tom·anio Mukul Sangma, Congress dolni candidate-ko seokchina Rajabala-ni manderangko didiangengon, NPP-ni dilgiparang chalakki dake sorkariko rikna jotton ka·engoba da·alonan a·doko maming namroro silroroaniko ra·bana man·kujaenga ine parakangaha. Meghalaya a·doko aro mongsongbate Rajabala constituency-o maming namroro silroroaniko nikna man·jaengani giminsa ia constituency-ni manderang ia chango NPP-chi dilenggipa MDA sorkariko jegale Congress dolna pu·ontokna sienga ineba Mukul parakataha.
“Ia sorkari (NPP) da·onan mingsa gital project-koba a·bachengatna man·kujaenga. Congress sorkarini somoio a·bachengatgipa scheme-rangba ia sorkarini a·selan chu·sokna gita man·kujaenga. Ia pilakan NPP sorkarini choligijaniko mesokani ong·enga,” ine Mukul Sangma aganaha.
Ia tom·anio Mukul Sangma-ni jonggipa aro Rangsakona-ni Congress MLA Zenith Sangma-ba jinmana aganprakangengon, election-ni somoirangode pangnan NPP dol, pu·ongiparangko salna jotton ka·ronga indiba cheani ja·mande pu·ongiparangkon gualrongaia ine matnangatskaaha.
Indake ong·engon, ia campaign ka·ani bon·kamgipa salo, Meghalaya a·dokni Chief Minister aro NPP-ni national president Conrad K Sangma-ni dilanichi NPP-ni tom·aniko Bhaitbari songo ong·atangaha aro ia tom·anio NPP-ni dingtang dingtang dilgiparang aro NCP-ni state president Saleng Sangma-ba dongpae bak ra·angaha.
Ia tom·anio NPP-ni national president Conrad Sangma, Rajabala constituency-ni manderangna aganprakangengon, Rajabala constituency-o NPP aro una kenesa Congress dol, NPP-ni kosako Rajabala-ni manderangna tol·e sakki on·enga indiba ua an·tangde Rajabala-o songdongenggipa manderangni neng·nikani aro nangnikanirangko ma·sie ra·na gitasa constituency-o dongkame NPP-ni candidate-na campaign ka·aha ine parakangaha.
“Mukul Sangma, bilsichetna chief minister ong·ahachim aro ua somoirangode NPP-o MLA sakgnisan dongaiachim. Indiba manderang Congress-ko aro Mukul Sangma-ko jegalgrimtokaha aro da·o NPP baksa nangrimtokaha,” ine Conrad aganaha.
Mukul Sangma-ni sorkari kam ka·jahani giminsa manderang jegaltokaha ineba ua aganaha.
Meghalaya a·dokni damgittam Assembly constituency-ni by-election-ko October 30 tariko ong·atenba, by-election-ni result-ko November 2 tariko parakna siengachim.