TURA: COVID-19 sajinmani somoirango an·tangtangko on·kange kam ka·gipa Tura Maternity & Child Hospital (MCH)-ni doctor-rangko Tura BJP Mahila Morcha-ni matnange songbadrango seatahani gimin ia hospital-ni medical superintendent an·tangni suk ong·gijaniko parakatenba, Mahila Morcha-ni matnange seatgipa kattarangna agan-talatanirangko on·angskaaha.
“MCH-o kam ka·enggipa doctor-rangni kosako BJP Mahila Morcha-ni matnanganirangara kakket ong·ja aro ian hospital-ko aro hospital-o kam ka·enggiparangni bimingko ong·siatna jotton ka·anisan ong·aia ine anga skanggipa talataniko on·chengna ska,” ine Tura MCH-ni medical superintendent parakataha.
Medical superintendent-ni parakatani gitade, adita salrangna skang, Mahila morcha-ni president Rakhi K Sangma aro mahila morcha-ni gipin membor-rang, COVID-na dongimin niamrangko pe·e hospital-ni Covid ward aro gipin kuturirangko re·roroe niangaha aro uamang maming mask aro PPE-rangko gangijasa hospital-ni general room, operation theatre, sonography room aro uandakgipa kuturirangko nape niangahachim.
“Tura-ni MCH-o palang ge 50-san dongaia indiba chinga salprako sak 200 sagipa manderangna biapko on·enga. Hospital-o doctor, nurse aro gipin staff-rangba chu·ongja indiba kam ka·giparang chu·ongjagenchimoba chinga OPD, OT, emergency OT, emergency duty aro Covid Ward-rangoba dangdike on·enga. Ia hospital-o gynaecologist saksa aro paedictrician saksasan dongaia indiba ia hospital-on Garo Hills gimikoni watatgipa sagiparangko sanna bane on·enga,” ine medical superintendent parakataha.
Out Patient Department ba OPD-ni somoio doctor-rang golpo ka·esa rotokaia ine mahila morcha-ni matnanggipa kattarangna aganchakaniko on·angengon, OPD-ni somoio kam ka·giparangna minute 15-ni tea break donga indiba ua somoioba sagitikgipa ba bilonge sagipa manderang OPD-ona sokbagenchimode doctor aro nurse-rang bakan sagipako nichengrongaia ine Tura MCH-ni medical superintendent talataniko on·angaha.
Hospital-o sonography machine-rang donggenchimoba private clinic-rangonasa watatrongaia ine matnanggipa kattarangna aganchakaniko on·angskaengon, “Da·o dipet ia hospital-o kam ka·enggipa sonography portable machine ge·sasan dongaia aro ia machine-ko kraa gitasan kam ka·na man·aia. Ia hospital-ni ‘sonologist’ doctor-rangba an·tangtangni sonography-ni kamrang baksana OPD, OT, emergency OT, emergency duty aro uandakgipa kamrangko ka·enga aro ia kamrangko uamang maming matnangani grian ka·enga,” ine Medical superintendent parakataha.