TURA: Petrol aro diesel-ni kajinarangko ma·mong sorkari adita komiatani ja·man Meghalaya a·dokoba petrol-ni dam gong 99-ona komiangpilaha.
Petrol aro diesel-ni damrang tang·dorikrikbaengani a·sel ramram manderangsa neng·nikanirangko chagrongna nangtokengahani gimin dingtang dingtang dolrang sorkarini kosako jegalanirangko daktokengachim aro uandaken manderangni jegalanirangko aro petrol, diesel-rangni damko komiatpilchina dabianirangko man·e ma·mong sorkari, petrol-ni kajinako gong 5/-chi aro diesel-ni kajinako gong 10/-chi komiatahachim.
Petrol aro diesel-ni kajinarangko ma·mong sorkarini komiatani ja·man Meghalaya a·dokoba petrol aro diesel-ni dam adita komiangpilaha.
Petrol pump nokgiparangni u·iatani gitade, Bristibar salo petrol-ni dam Shillong-o 99.17 ong·aha aro Tura-o gong 99.39 ong·aha aro apsan daken diesel-ni damba Shillong-o gong 85.91 aro Tura-o gong 86.07 ong·skaaha.
Petrol-ni kajinako gong 5-chi aro diesel-ni kajinako gong 10-chi ma·mong sorkarini komiatani ja·man dingtang dingtang a·dokrangba petrol aro diesel-ni Value Added Tax (VAT)-ko gong 7-chi komiattokaha ine kobor on·aha.
Budbar salona kingkingan Meghalaya a·doko petrol-ni dam 104-na batengachim aro diesel-ni damba gong 97 batengkuachim.