TURA: Garo Hills-o songdongenggipa manderangna dingtang Garoland a·dokko dabidilengon, ia dabianiko bilakbatatna aro iani bidingo songni nokni manderangna agan-talate on·na gita Sonibar salo Garoland State Movement Committee (GSMC)-ni tom·bimonganiko Raksamgre civil sub-division-ni ning·o donggipa Matchokgre songo ong·atangaha.
Ia tom·bimonganiko ong·atanio GSMC-ni dingtang dingtang dilgiparang baksana, AIGU, GSU Mahindra-Pik Up Association-ni dilgiparang aro dingtang dingtang songko nokko dilgiparangba bakko ra·angtokaha.
Ia tom·bimonganiko ong·atanio GSMC-ni co-chairman Balkarin Ch Marak, ia tom·bimonganiko ong·atani bidingo jinmana talate on·angengon, A·chikrangna dingtang a·dokko dabianiara da·o dabienggipa kamsa ong·ja indiba ian chengoni jatko dilanggipa manderangni dabianian ong·enga ine talatangenba, ia dabianiko chu·sokgipa ong·atna gita pilakkon bakrime kam ka·china gita didiangaha.
“A·chikrangoniba chengonin dingtang dingtang kamrango mingsing minggamako man·giparang bang·en donga aro Garoland a·dokna dabiani be·en pil·genchimode mikkangchiba A·chikrang namen niksenggipa jat ong·gen,” ine Marak aganaha.
Ia tom·bimonganio GSMC-ni assistant general secretary Cyril A Sangma-ba dongpae jinmana aganprakangengon, Garoland a·dokko man·genchimode A·chikrang pilakni gita namroro silroroaniko man·pagnokchim ine dingtang Garoland a·dokna dabianio bakrimchina gita jolo songdongenggipa manderangko didiangaha.
