SHILLONG: University of Science & Technology Meghalaya (USTM)-na National Assessment & Accreditation Council (NAAC)-ni Grade ‘A’ upattiko on·anina dingtangmancha mittelpilani program-ko Bristibar salo USTM-o ong·atangaha aro ia program-ko ong·atanio Meghalaya a·dokni Chief Minister Conrad K Sangma, mongsonggipa sokgipa ong·e bakko ra·angaha.
Ia program-ko ong·atanio a·dokni Chief Minister baksana India sorkarini Space Department-ni ning·o donggipa NESAC-ni Director Dr SP Aggarwal, NEHU-ni Vice Chancellor Prof Prabha Kr Shukla, gipin dilgiparang aro official-rangba dongpae bak ra·angaha.
Ia program-ko ong·atanio a·dokni Chief Minister, jinmana aganprakengon, NAAC-ni Grade ‘A’-ko man·ahani gimin USTM-ni Chancellor Mahbubul Hoque, skigiparang aro chatro chatrirangko mittelpilangenba, uamangni bimchipe kamko ka·anichian ia university Grade ‘A++’-koba man·gen ine parakangaha.
USTM-ni Chancellor-ko mittelpile aganengon, uni kamtangko bimchipani aro niksamsoani gnang kam ka·anian salgro salaram a·dokrangna mikkangchi ka·dongani ong·skaenga ine Chief Minister parakataha.
Ia salo a·dokni Chief Minister, USTM-o gital tarigipa Mahatma Gandhi-ni statue-ko oprake on·angjolaha aro ja·mano USTM-o donggipa PA Sangma International Block-ni Central Instrumentation Centre-koba niangjolaha.
Ia program-ko ong·atanio USTM-ni Chancellor Mahbubul Hoque, rimchaksoani kattarangko aganangengon, 2026 bilsini gisepo ia university Grade ‘A++’-ko man·na krengenga aro 2030 bilsini gisepon USTM-ko a·gilsak gimikchi niksenggipa ong·atna uamang rakbee kamko ka·enga ine parakangaha.
Ia program-ko ong·atanio dongpae jinmana aganprakanggipa gipin manderangara NESAC-ni Director Dr SP Aggarwal, NEHU-ni Vice Chancellor Prof Prabha Kr Shukla, USTM-ni Vice Chancellor Prof GD Sharma aro gipinrang ong·a.