SHILLONG: Assam aro Meghalaya a·dok damgnini simarango meligrikna man·jaenggipa biaprangoni komibeoba biap damdokko da·o Krismasna skang sorkari, namatna jotton ka·gen ine uni agananiko mitam manderang ma·sisrettokenga ine Meghalaya a·dokni Chief Minister Conrad K Sangma talataniko on·angaha.
“A·dok damgnini simarango meligrikna man·jaenggipa biaprangko namatna aro skanggipa bako chinga damdok biaprangko namatchengna cholko sandigen inesa anga aganahachim. Ia biap damdoko meligrikgijanirangko namatna gita chinga cholrangko sandina nanggen ineba anga aganahachim. Indake ong·genchimoba mitam kobor setimgiparang angni agangipa kattarangko dingtangataha maina ia pilak neng·nikanirangko namatna chinga cholrangko man·gen inede anga agankujachim,” ine re·anggipa Robibar salo Chief Minister Conrad Sangma parakataha.
Chief Minister-ni aganani gitade, a·dok damgnini gisepo meligrikgijaniko namataniara namen rakbegipa kam ong·gen ineba ua a·bachengonin aganmanahachim.
“Ia neng·nikanirangko chinga salsani gisepon namatna man·gen indake ong·ja indiba chinga kamrangko a·bachengataha inesa ong·engachim,” ine Sangma aganaha.
Meligrikna man·jaenggipa mitam biaprango aro mongsongbate skanggipa bako namatna gita uamangni jako ra·chengenggipa damdok biaprango uamang meligrikgijanirangko namatna gita cholrangko man·gen ineba ua an·tangni ka·dongchakenganiko parakataha.
“Ian Krismasna skangba ong·naba gnang ine chinga ka·dongenga. Ia neng·nikaniko namatna gita chinga rakbee kamrangko ka·chakatenga aro cholrangko sandina jotton ka·enga ine anga jegalenggipa dolrangna talataniko on·na ska,” ine Chief Minister parakataha.
Ia changode a·dok damgnian ia meligrikgijaniko namatna gita gisiko nange kamko ka·enga aro iani giminsa batanggimin somoirango dingtang dingtang committee-rang, chang 15 ba chang 20-na baten ia sima jolrangona re·ange, diltugipa biaprango am·sandianirangko dakangaha ineba Chief Minister parakataha.
“Ian altua kam ong·ja aro chinga gimikko namatna man·jagenchimoba man·a dipet chinga jotton ka·gen. Indiba mitam neng·nikanirangkode chinga bakan namatna gita cholrangko man·na ka·dongenga,” ine Sangma aganaha.
Assam a·dokni simarango meligrikgijanirangko namatna gita sorkari sikkele kam ka·genchimode Krismasni somoirango so·sojengjeng ong·anirangko niknaba gnang ine adita salrangna skangsan Congress dol, mikrakataniko on·angahachim ine nikna man·a.
A·dok damgnini simarango meligrikgijanirangko namatna kam ka·anio MLA-rangkoba bak ong·atchina gita Congress dolni MLA Ampareen Lyngdoh dabiangahachim.