TURA: Dadenggre sub-division-ni dingtang dingtang health centre-rango kam ka·enggipa medical & health officer-rang jagni batpile dormaharangko man·kujaengani a·sel neng·nikanirangko chagrongna nangtokengahani gimin November 22 tarik dipet kamrangko dontongatna tik ka·aha ine kobor on·aha.
Iani bidingo Dadenggre sub-division-ni ning·o kam ka·enggipa medical officer-rangni Shillong-o donggipa Health Services (MI)-ni Director-na sedoatani gitade, Dadenggre sub-division-ni dingtang dingtang health centre-rango kam ka·enggipa medical officer-rang jagni batpile dormaharangko man·tokkujaenga aro MPSC-ni 3(F) ning·o kam ka·enggipa medical officer-rangde jabongoni jachet ong·piloba dormaharangko man·tokkujaengachim.
“Chingni dormaharangko man·kujaengani gimin chinga November 3 tarikon Health & Family Welfare department-ni Principal Secretary-na seachi u·iatahachim indiba da·alonan iani bidingo maming ja·kurangko de·kujaengani gimin chinga re·anggipa November 19 tariko jinma tom·e chanchirimaha aro chingni dormaharangko on·kujaskal chinga November 22 tarik dipet kamrangko dontongatna tik ka·aha,” ine Dadenggre sub-division-ni medical & health officer-rang, Health Service (MI)-ni Director-na sedoatgipa chittio parakataha.