SHILLONG: Garo Hills-ni sak 9 MLA-rangni Congress-ko wate All India Trinamool Congress (AITC)-o napanganichi party-na sinjetanide ong·aha ine MPCC general secretary, Deborah C. Marak jechakgijan aganaha.
“Indiba Garo Hills-ni ramram manderangara ia gitalgipa AITC party-kora ra·chakna man·genma man·jawa, uasa dal·gipa sing·anide ong·enga. Congress, NPP aro NCP mangba an·tangtangni vote bank dongmanaha. Indiba AITC-de gitalgipa party ong·enga, uamang nokkraonin kamrangko a·bachengna nanggen” ine MPCC general secretary Robibaro aganaha.
Pa Sangma sagi-ba Congress-oni ong·kate NCP-ko a·bachengmitingo neng·nikaniko man·ahachim ineba Marak toe aganaha.
“AITC-ko manderang maidake chanchigen chinga uko ma·sija. Ia gitalgipa party-na manderang puongenma puonjawama, uade manderangosa pangchakaigen. Election-o bilko jakkepnade AITC-ni jako ong·ja” ineba Congress dilgipa aganaha.
Unomitingo MPCC general secretary indakeba aganaha ian namen rasong griani ong·aha, maina sak MLA-rang, uamangni party-oni ong·katgnini gimin GH-ni Block Congress Committees (BCCs) ba District Congress Committees (DCCs)-na mangba mamingkoba u·iatchengjaha.
“Uamangni rang·gitik party-oni ong·kate katanganiara chongko jagokataha,” Marak aganaha.
Garo Hills-ni dam 24 Constituency-ni BCC-rang gimikan bakrimenga, party-ko tangchaatpilna aro bilakatpina seng·gnangen kam ka·gen ineba ua agandapaha.
Garo Hills-o Congress party-ko bilakatna uo dal·bea daito dongengaha ine MPCC general secretary aganaha.
“State Congress padot, Vincent H. Pala baksa Garo Hills-ni pilak dam 24 Constituency-rangkon mikkang January jaoni intal wenrorona gita anga miksongman·aha. Anga ka·donga, NSUI, Youth Congress aro State Mahila baksa angni ru·uta bilsirangna kam ka·rime ma·sianirang, ongipa gadangoni intal party bilakatna kam ka·anio dakchakaniko on·gen,” MPCC general secretary aganaha.
Marakni aganani gitade, Augustine D. Marak, FW Momin, Atul Marak, Rophul S. Marak gita dakgipa gitcham dilgiparang party-ona re·bapilna am·tokenga.
Unomitingo, NCP president aro Gambegre legislator, Saleng A Sangma-koba party-ona rimbana gita ua jotton ka·enga ineba Marak aganaha.
Party-ni gitcham dilgiparang party-ni re·bapile re·baenggipa assembly poll-rango susagenchimode party-ko tangchaatna namen dakchakbeani ong·gen, ianan anga gitcham dilgiparangko party-ona rimbapilna jotton ka·enga. Uamang dakchakaode anga mamingsaloba saksanjawa,” MPCC general secretary aganaha.
