Salgro salaram jol gimikon Trinamool Congress-ko gipatna miksongenga: Mukul

SHILLONG: Re·baenggipa 2024 bilsini Lok Sabha election-na skang salgro salaramni pilak a·dokrangon Trinamool  Congress (TMC)-ko gipatna gita dolni dilgipa Mamata Banerjee nangnikenga ine Sombar salo, TMC Meghalaya unit-ni dilgipa Mukul Sangma parakataha.
Sombar salo, Mukul Sangma baksana Congress doloni ong·kate TMC-o napanggipa gimik sak 12 MLA-rang, TMC-ni president Mamata Banerjee-ko West Bengal-o grongeahachim.
Indake ong·engon, unbaksana Congress dolni mongsonggipa dilgiparangan da·o a·songo gitchambatsranggipa Congress doloni ong·katahani gimin salgro salaram jol gimikon politics-ni bilakani dingtanggnok ine Meghalaya a·dokni gitcham chief minister Mukul Sangma parakataha.
“Salgro salaram jolo donggipa gipin a·dokni dingtang dingtang dilgiparang baksaba anga agangrikenga aro chingni Congress doloni ong·kate TMC-o napangani ja·man uamangba angna phone ka·atenga. Ian uamangba an·tangtangni a·doko maiba dingtanganiko nangenga ine mesokani ong·a,” ine Sangma aganaha.
Ua ru·uta somoirangna skangan ia gital dolo napani ong·achim ine janapatengon, Congress dolni ka·sindugagipa kamrangni a·selan bang·a dilgiparang Congress-oni ong·katgrimaha ine Sangma parakataha.
Meghalaya a·dokni manderang TMC-ko ra·chaktokaegen ine an·tangni ka·dongchakenganiko parakatengon, TMC-ara Meghalaya-o gital political dol ong·ja ine Sangma talataniko on·angaha.
“Anga angni manderango ka·donga aro anga uamangko namen ma·sia. Angni ka·donganian angna bilko on·gipa ong·a,” ine Sangma aganaha.
2023 bilsini Meghalaya Assembly election aro 2024 bilsini Lok Sabha election-ara TMC-na namen mongsonggipa dake niani ong·gen ineba TMC-ni gital dilgipa parakataha.
Lok Sabha-ni gitcham Speaker aro Meghalaya Chief Minister Conrad Sangma-ni pagipa PA Sangma sagiba skango changsade TMC-oni susaen, Tura Lok Sabha Election-o seokako man·ahachim ine nikna man·a.
Indake ong·engon, Charles Pyngrope-ko Meghalaya a·doko Trinamool Congress-ko dilna gita seokaha ineba koborko on·ataha.
Sombar salo TMC-ni chairperson aro West Bengal-n Chief Minister Mamata Banerjee-ko sak 12 MLA-rangni grongeani ja·man iako u·iataha.