SHILLONG: All India Trinamool Congress dolni Meghalaya a·doko napani bidingo maming dakeba BJP dol jajrengja maina ‘jajrenga’ ingipa katta BJP-ni dictionary-on dongja ine BJP national executive membor aro Pynthorumkhrah-ni MLA, AL Hek aganaha.
All India level-o BJP dolna agre gital dolo nape niksengna miksonge a·dokni sak 12 Congress MLA-rangni AITMC dolo napani ja·man Hek indakgipa kattarangko aganaha.
Hek-ni aganani gitade gimik political dolan an·tangtangni miksongani aro nangnikani donga aro indakgipa statement-rangde manderangna u·iatmangmanganisan ong·aia. A·songna dangdike on·na BJP dolni miksongani ong·a, ine ua aganaha.
Je political dolba a·songni je biaprango susana gita bil donga. “Elections-ni somoio ua dol namnikaniko man·ama man·jawa uade a·dokni manderangosa pangchaka,” ine Meghalaya-o AITC-ni napani bidingo ua aganaha.
